María Fumaça

María Fumaça

Galaxia, Vigo, 24 páxinas,  22 €

 

Hai proxectos, neste casos editoriais, concretamente literarios e musicais, dos que cómpre sentirse orgullosos, engadiría que individual e mesmo colectivamente. Ao meu ver, esta é unha das ocasións acaídas para manifestalo pois este libro-disco-dvd é xa unha realidade que, non teño dúbida, deita ás mancheas enormes doses de optimismo, entusiasmo, orixinalidade e, mesmo, deposita na súa formulación un excepcional coidado estético que é de xustiza salientar.

      Mais, que é María Fumaça para quen non o coñeza? Un libro que, ilustrado por P. Pastor, consegue estenderse cara aos eidos da música e o audiovisual  mercé á colaboración  de artistas como Uxía, Sérgio Tannus, Magín Blanco, Isaac Palacín, Tanxarina, Carlos Blanco, Ruí, a familia Domínguez Senlle e outras moitas persoas. Un libro-disco, abofé, mais talvez algo máis que iso pois ao obxectivo inicial de evidenciar que tamén a música reivindica a diferenza e contribúe a convivir e coñecer persoas con discapacidades ou con capacidades diferentes, xúntaselle moita paixón, moito agarimo e moito talento. Que a música, e a literatura tamén, une é unha verdade de pé banco: salta valados de idades e fronteiras e iso testemúñase ás claras en cada unha destas cancións. Ben merece que se fale deste María Fumaça  pois eu só lle vexo acertos. Parabéns polo proxecto.

PD. Grazas a Iolanda Veloso polas súas atinadas, e xustas, reflexións privadas ao fío desta anotación.