Rosa Caramelo, de Adela Turín e Nella Bosnia

Adela Turín

Rosa Caramelo (ilustracións de Nella Bosnia, tradución de G. Tolentino)

Kalandraka, Pontevedra, 2012, 40 páxinas, 15 €

Poderíanse facer moitas recomendacións un día coma o de hoxe, 8 de marzo, Día da Muller. Particularmente convidaría a achegarse a calquera libro, escrito en lingua galega, das nosas narradoras, poetas, ensaístas ou dramaturgas, de onte ou de hoxe,  parte desa mesma estirpe que procede de Rosalía, mesmo de máis atrás, e que se estende ata os nosos días. Calquera das voces femininas que aparecen por esta bitácora, e tamén as que non aparecen por suposto, son ben merecentes de atención xa non hoxe senón todos os días.

    Malia o afirmado, e pensando nos valores didáctico e no fomento do espírito crítico de quen se achega ás súas primeiras lecturas lembrei que,  tras a aparición de  Artur e Clementina de  Adela Turín e Nella Bosnia,  a mesma editorial que acolleu aquela edición puxo en circulación, hai poucos meses, o título Rosa Caramelo das mesmas autoras, un libro, ao meu ver, insubstituíble.

    Rosa Caramelo inspírase nunha historia abeirada á imaxinación, coma se fose unha fábula, protagonizada por elefantas e elefantes, que camiña lizgaira e rotundamente cara a ofrecer unha inequívoca lectura simbólica que transita pola defensa férrea de valores como o dereito a elixir libremente, o respecto á diferenza abrazando e difundindo, por extensión, conceptos como ter presentes os conceptos da loita contra a desigualdade, contra os estereotipos e mais contra a discriminación sexual.

    Alento, a quen non o coñeza, a achegarse a este título que debería ser unha lectura obrigatoria nas nosas escolas (velaquí unha útil guía didáctica que circula na rede) para evitar, nun futuro próximo, dolorosas lacras sociais.