Déronse, practicamente, por concluídas as actividades desenvoltas neste curso escolar no seo do Club de Lectura do IES Valadares (Vigo) coa visita, e posterior encontro, co narrador Santiago Jaureguizar.
A desculpa foi a lectura de Amor de serea, a terceira entrega da serie protagonizada por Tintimán que, tras o seu paso por A Coruña e mais Compostela, recalou en Vigo para solventar un enigma relacionado cos galeóns de Rande.
O autor lucense comezou por revelar algúns extremos arredor da lectura visual que realiza o ilustrador Matalobos para os seus proxectos narrativos para logo afondar na xénese desta serie narrativa orientada cara ao lectorado xuvenil e que radica na vontade de artellar unha aventura de corte clásico, co correspondente heroe e mais o seu contrapunto, neste caso feminino, inspirándose nos personaxes de Tintín e mais Indiana Jones, que serviron para compor o seu perfil. Insistiu, asemade, na intención irónica, esperpéntica e ridiculizadora depositada nalgúns personaxes, alén da vontade expresa de dotar á narración dun ritmo áxil e fluído.
Non resultou menos interesante o que atinxiu ás técnicas de construción empregadas na novela alén doutros elementos -os premios literarios, o xornalismo, as chiscadelas ao lector adulto…- que xurdiron nun rico e intenso diálogo final. Grazas a Jaureguizar pola súa presenza, grazas ás lectoras e lectores pola súa participación tan entusiasta.
Caderno da crítica 