Na presentación d´O corazón da Branca de Neve de Francisco Castro

Participei onte na presentación d´O corazón da Branca de Neve de Francisco Castro na Casa do Libro de Vigo. Cun auditorio moi entregado que asistiu en gran número compartín mesa con Carlos Lema, quen verteu reflexións moi precisas sobre as orixes literarias tanto da novela por entregas como do xénero policial e, loxicamente, co autor da novela que debullou datos sobre a xestación do volume, os seus condicionantes creativos, a estrutura que a domina, a actualidade da temática recreada e, xaora, sobre ese inspector Hermida que volverá, ao que parece, cobrar vida en futuras entregas. Particularmente, na miña intervención, fixen o que puiden. Un pracer, reitero.