Novas Penzol, nº 6: Xosé María Díaz Castro: bibliografía e materiais de arquivo

Hai algún tempo dera noticia da aparición desta publicación en rede, singularmente cando foi dedicada aos fondos obrantes na Fundación Penzol arredor de Celso Emilio Ferreiro. Onte recibín o número seis desta entrega, da que segue a se responsabilizar o profesor e escritor Silvestre Gómez Xurxo e que, nesta ocasión, está centrada na bibliografía e materiais de arquivo obrantes nos fondos da Fundación Penzol, nomeadamente nas bibliotecas da Fundación Penzol e de Fernández del Riego, no Arquivo Fernández del Riego e nos Fondos Ramón Piñeiro.

         Resulta, ao meu ver, ben interesante  este boletín pois cataloga  e describe as monografías, os artigos de e sobre Díaz Castro, a correspondencia conservada con Del Riego e Piñeiro e outros documentos de interese. Ao tempo, reprodúcese algunha cuberta e mais algunha mostra do epistolario de Díaz Castro, como esta de abaixo dirixida polo escritor de Guitiriz a Fernández del Riego en 1957. Grazas por unha publicación tan útil para  a investigación, co desexo que se dispoña en liña para a súa efectiva difusión.

2 Comments

  1. Graciñas Ramón pola túa garimosa crítica sobre o NOVAS PENZOL 6.
    Como Director da Fundación Penzol quero facerche chegar o noso agradecemento pola resoancia tan construtiva que dás ao noso traballo.
    Apertas fondas.
    Quico Domínguez

Os comentarios están pechados.