De mañá nunha semana terei o pracer de acompañar a Manuel Bragado e ao meu colega docente e investigador Lucio Martínez Pereda na presentación dun ensaio que entendo especialmente oportuno como é Medo político e control social na retagarda franquista. Acolleranos, así pois, o 11 de marzo a Casa do Libro de Vigo, ás oito da tarde.
Volverei máis adiante, por escrito, sobre este libro extraordinariamente documentado no que, con profusión de datos, se desvela e reinterpreta unha palpable, aínda que oculta, realidade como foi a dinámica represiva exercida desde a fin da guerra civil, analizada con lucidez e paixón investigadora. Deixo aquí un convite para a asistencia a este acto.
A CASA DO LIBRO DE VIGO
e EDICIÓNS XERAIS DE GALICIA
aprácense en convidalo/a á presentación do libro:
Medo político e control social na retagarda franquista
de Lucio Martínez Pereda
O acto, que contará coa participación de Ramón Nicolás,
Manuel Bragado e Lucio Martínez Pereda,
terá lugar o mércores, 11 de marzo, ás 20:00 horas,
na Casa do Libro, Velázquez Moreno, 27 de Vigo
