Dous libros (galegos) para o Día Internacional da Muller Traballadora

Entre outros moitos libros que axudan a entender as razóns dunha xornada reivindicativa como a de hoxe  escollo dous títulos que, particularmente e no ámbito do ensaio, modificaron moitas percepcións en min e contribuíron, con argumentos sólidos e de peso, a obter un coñecemento científico, desde o humanismo, tanto da historia das mulleres en Galicia como do pensamento feminista, ou mellor sería dicir dos feminismos.

       O primeiro é un libro recente, que recomendo vivamente a súa lectura se non se fixo xa,  e que é Feminismos de Olga Castro e María Reimóndez, sobre o que me pronunciei no seu día e que resulta de consulta obrigada. O outro título, non menos recomendable e que abre,  asemade, outras portas ao coñecemento, editouse no ano 1999 e foi coordinado por María Xosé Rodríguez Galdo baixo o título de Textos para a historia das mulleres en Galicia; neste caso pódese acceder a el premendo na mediateca do Consello da Cultura Galega. Dous libros, ao meu xuízo, imprescindibles para celebrar, tamén coa lectura, o Día Internacional da Muller Traballadora.