Caderno da crítica

Literatura galega: de todo un pouco; ás veces tamén opinións. Blogue de Ramón Nicolás

Breviario, en Biblos. Revista Galega de Información Literaria, nº 74

  1. En todos estes anos de colaboracións coa revista Biblos, unha cita sempre feliz para min, manteño sempre a norma de non me referir a libros ou asuntos que teñan que ver comigo ou cos traballos que levo a cabo. Nesta ocasión vou facer unha excepción que tanto as persoas que len estas pequenas reflexións como Carmela González e Tucho Calvo, estou certo, van desculparme pois a miña intención é a de expresar publicamente o meu agradecemento polo seguimento desoutra ventá, neste caso virtual, onde desde hai algúns anos veño incorporando recensións, reseñas, entrevistas, espazos para a creación literaria, información cultural ou literaria que estimo de interese –tamén esta propia columna, abofé- que é o Caderno da crítica. Gratitude, fundamentalmente, a quen transitan por ela para se informar das novidades literarias, mais tamén a aqueloutras entidades públicas e privadas, editoriais, librarías e persoas concretas –imposible citalas a toda aquí- que, con xenerosidade desde o primeiro momento, sempre apoiaron este proxecto que, sen pensalo, verteu unha imaxe dixital de quen o administra e que, por outro lado, tantas e impensables satisfaccións me deu e me dá. Moitas grazas.
  2. Neste mes de maio resulta inevitable se referir ao Día das Letras Galegas. Particularmente sigo mantendo a mesma opinión sobre o pouco acaído, xustamente neste ano, que resultou a elección do personaxe que o protagoniza e remítome tanto á escasa repercusión que o nomeamento gozou nos ámbitos do ensino e no mundo editorial como ao incomodo que a súa designación suscitou nunha parte importante e activa da sociedade civil galega. Dito isto igualmente teño para min que non se pode negar a achega intelectual que Filgueira Valverde realizou ao longo da súa vida, realmente monumental desde o punto de vista da investigación e que, negala ou ocultala, resulta carente de todo sentido.
  3. Conclúo cunha recomendación dun libro que, curiosa e significativamente, non se vende. Refírome a Poétic@, de Fran Alonso, que se pode ler e gorentar neste enderezo virtual: http://poetica.gal/. Unha proposta literaria, arriscada, xenerosa, novidosa, rompedora, inusual e, se non estou errado, con escasas semellanzas noutros sistemas literarios próximos. Convido vivamente a pasear por este libro electrónico pois non deixará indiferentes ás  persoas que o fagan: iso cando menos.
Advertisements

Páxinas

Categorías

Arquivo

%d bloggers like this: