Caderno da crítica

Literatura galega: de todo un pouco; ás veces tamén opinións. Blogue de Ramón Nicolás

Fin de festa, de Diana Varela Puñal

Diana Varela Puñal

Fin de festa

Laiovento, Compostela, 76 páxinas, 8 €

 

Primeira novela de Diana Varela que percorre os camiños da evocación sen esquecer emitir luzadas críticas cara a un sistema de valores caduco e moralizante

 

Proba fortuna a escritora cormelá Diana Varela no eido da narrativa, tras diversas e galardoadas incursións poéticas, dramatúrxicas e outras dirixidas a un lectorado novo. Faino cun exercicio no que sutura, se cadra, máis memoria que ficción, inspirándose ao que parece na contorna natal, isto é, no ámbito no que a autora alentou os días da infancia e a adolescencia. O resultado é unha sorte de radiografía, unha ollada nada melancólica, ao meu ver, dirixida a ese espazo particular que bautiza como Xuvino e que se percorre da man da figura, sólida e ben perfilada, de Susi Arnela, cuxo protagonismo ocupa catorce entregas, ao tempo que a novela se complementa con outras trece visións mais un epílogo, que dotan de cabal sentido á proposta.

      Desvelar as arestas de Susi Arnela, quen afinca a súa presenza desde as instancias da sensualidade e a intelixencia, supón asistir ao proceso que a irá moldeando, manipulando e destruíndo a un tempo pois xustamente eses dous elementos que a caracterizan, a forza de espertar envexas e frustracións, acabarán por convertela nunha “bolboreta fendida”. Esta visión enriquécese coa que ofrece outra  voz narrativa, unha amiga da protagonista, que rememora o pasado común,  mais tamén todo aquilo do que foi testemuña –expoñéndoo pero nunca xulgándoo- para o que acode á memoria persoal e comunal, ambas as dúas operativas para describir o espazo de Xuvino, poboado por personaxes curiosos e, probablemente, irrepetibles; mais tamén por abrazar os ecos dunha tradición ancorada a unha moralidade no fondo perversa e destrutora que contribúe ao estrago dunha vida que non era, dalgún xeito, nin gris nin nada común.

Esta recensión publicouse nas páxinas do suplemento Fugas, de La Voz de Galicia, o 28 de agosto de 2015, baixo o título de “A historia de Susi Arnela”.

Advertisements

Un comentario en “Fin de festa, de Diana Varela Puñal

  1. Pingback: Recomendamos: Fin de Festa, de Diana Varela Puñal | Librería Sisargas

Os comentarios están pechados.

Información

Esta entrada foi publicada o 1 Setembro 2015 por en Crítica literaria,Literatura galega,Novela , , , .

Páxinas

Categorías

Arquivo

%d bloggers like this: