Caderno da crítica

Literatura galega: de todo un pouco; ás veces tamén opinións. Blogue de Ramón Nicolás

De remate, de Héctor Cajaraville

Héctor Cajaraville

De remate

Xerais, Vigo, 216 páxinas, 16,65 €

 

Galardoado co premio Xerais 2015, «De remate» supón a carta de presentación dun orixinal e prometedor creador

 

 

Dá xenio ler esta novela, a primeira, de Héctor Cajaraville onde, ademais de entreter e divertir -que non é pouco- revitalízase o concepto de novela, aventurándoa por novos horizontes. O autor ofrece unha fusión, se se quere unha compilación estruturada milimetricamente, integrada por columnas de opinión, fragmentos dun diario, apuntamentos de diversos blogs, entrevistas, borradores de documentos informáticos, correos electrónicos, poemas ou mesmo documentos de índole xurídica: pequenas illas narrativas que funcionan a xeito de matrioskas a suxeriren arreo novas historias  a través da presenza, e da memoria, de Bieito Sanmarful: un «Balbino do século XXI» e xornalista de profesión, a quen é difícil non querer tras coñecer o que nos revela da súa vida, talvez porque esta se materializa coas súas propias contradicións e cos seus fracasos, tamén con algúns éxitos colleitados.

      De remate, ademais, é quen de radiografar, con profundidade e mesmo enxeño en moitas ocasións, e mercé ás confesións, evocacións, recordos e experiencias relatadas, o discorrer do noso tempo, as precariedades e miserias que nos rodean con acaídas doses de humor e ironía, elevadas a trazos singularizadores do propio Sanmarful e mesmo da novela, o que posibilita articular un personaxe sólido, dominado por esa indisimulable querenza a analizar a realidade do seu día a día desde outro prisma diferente; tamén pola tendencia a fantasiar, por ser un militante da palabra, por ser quen de revisar o seu propio pasado, por veces con nostalxia como é case inevitable mais sempre con honestidade. Hai moito sentimento e emoción neste último premio Xerais e, xa o dixen, moito humor, cousa que sempre é de agradecer.

Esta recensión publicouse nas páxinas do suplemento Fugas, de La Voz de Galicia, o 8 de xaneiro de 2016, baixo o título de “Matrioskas cheas de vida”.

Advertisements

Un comentario en “De remate, de Héctor Cajaraville

  1. contradiscurso
    12 Xaneiro 2016

Os comentarios están pechados.

Páxinas

Categorías

Arquivo

%d bloggers like this: