Na presentación de “Lourenço, xograr” de Manuel Portas (Librouro)

Resultou, para min, unha satisfacción participar na presentación de Lourenço, xograr na libraría viguesa Librouro, a carón do autor desta poliédrica novela, Manuel Portas, e mais de Carlos Lema, en representación da editorial Galaxia. O serán converteuse nun animado faladoiro no que dialogamos sobre a proceso de xestación e construción da novela; centrámonos tamén en asuntos como as razóns da escolla, precisamente, dun xograr como Lourenço para protagonizala; debatemos sobre as fronteiras entre historiografía e ficción e salientamos o sabor que outorga o rexistro lingüístico empregado, alén de repararmos na plasticidade destas páxinas e nas diversas lecturas “xenéricas” que ofrece, entre outras cuestións. Un encontro literario magnífico, sen dúbida (grazas a Fernando Fernández pola fotografía).