Unha das noticias literarias destes últimos días foi a concesión do Premio da Crítica 2015, organizado pola Asociación Española de Críticos Literarios e pola Asociación Galega da Crítica, tras unha votación das persoas que pertencemos a esta última asociación. Os galardoados foron O último día de Terranova (Xerais), de Manuel Rivas e mais O deserto (Apiario), de María do Cebreiro. Dous grandes libros, non teño dúbida, que volven deste xeito dispor de certa atención mediática, cousa que sempre é moi necesaria. A organización dunha entrega en Compostela deste galardón na sede do Ateneo creo que supuxo unha iniciativa espléndida e plausible. Parabéns a Chus Nogueira pola súa boa man como presidenta da AGC.- Na entrega anterior sinalaba, alén da obrigada referencia a Manuel María neste ano que andamos, cara a algunhas efemérides como o centenario de Lueiro Rey e os cincuenta anos da celebración do “Banquete de Ourense” no que se despedía a Celso Emilio Ferreiro. Deixei para esta entrega redactar unhas liñas sobre o centenario da creación das Irmandades da Fala. Polo de agora a efeméride non gozou de atención que merecería –fóra dalgúns proxectos ben interesantes na rede como o Almanaque das Irmandades (http://almanaquedasirmandades.gal/) ou a atención que se lle presta na web do Consello da Cultura (http://consellodacultura.gal/album/irmandades-da-fala/). Hai algúns proxectos institucionais en marcha e outras propostas que chegarán en forma de papel de editoriais como Xerais ou Laiovento, e mesmo tres antoloxías dispostas e organizada pola propia Real Academia Galega. Agardaremos por todos estas achegas pois participo da idea da relevancia que debería proxectar esta celebración nestes precisos momentos.
- Comezaron hai algún tempo as Feiras do Libro de Galicia. Achegar o libro á rúa é imprescindible mais teño para min que o seu modelo resulta, hoxe por hoxe, manifestamente mellorable, tanto no que se refire ao emprazamento que goza nalgunhas vilas e cidades como na propia dinámica que atinxe ás actividades que se organizan ao seu arredor.
- Unha recente polémica suscitada por un produtor musical e escritor chamado Julián Ruiz nun medio radiofónico galego público no que interviña para promocionar un libro e no que se sentiu molesto porque lle falaban galego debería facer pensar que moito mellor sería entrevistar a autoras e autores galegos nos nosos medios, e promocionar por extensión libros de noso. Evitariamos en ocasións, ben sei que non sempre, eses desprezos.
Este texto publicouse na revista Biblos, nº 80, maio-xuño 2016.
Caderno da crítica 