Caderno da crítica

Literatura galega: de todo un pouco; ás veces tamén opinións. Blogue de Ramón Nicolás

Un mundo de palabras, de Agustín Fernández Paz

Agustín Fernández Paz

Un mundo de palabras (edición de Isabel Soto)

Xerais, Vigo, 160 páxinas, 16,85 €

 

Pecha un con emoción a derradeira páxina deste libro. Con emoción porque durante unhas horas Un mundo de palabras posibilitou o reencontro co escritor, co lector, co docente, co pedagogo e co ser humano. E non é pouca cousa cando se fala de Agustín Fernández Paz, para min e para todas as persoas que chegaron a el pola lectura, pola docencia ou polos libros e que tiveron a fortuna de tratalo.

Isabel Soto, responsable da ordenación do material deste libro póstumo, é tamén a autora dun prólogo luminoso e exacto que decidiu titulalo con estas palabras “O legado dun lector: memoria e experiencia nas aulas”. En efecto, velaquí a memoria dun lector, dun lector por convicción, que aínda ten tanto que ensinarnos porque entendeu a lectura como fonte de pracer e de coñecemento.

O libro articúlase como unha compilación de textos diversos unidos, nesta ocasión, por ese fío común que é a relevancia depostida na lectura e sobre todo na lectura literaria: esa batalla cotiá na que aínda hai tanto que facer.  Desvélase aquí, como non podía ser doutro xeito, a memoria do Agustín lector desde neno onde esa experiencia sería fundamental para a súa vida como escritor: “escribo porque leo, porque ler e escribir son dúas actividades inseparables, como as dúas caras dunha moeda”. Mais ao tempo xúntanse textos de carácter máis teórico sobre a lectura que definen de seu a enorme bagaxe que o autor foi acumulando ao longo dos anos e, talvez o que resulta máis relevante, a vontade que sempre atesourou por contaxiar a paixón pola lectura, tamén como docente, incorporándose así os testemuños da súa propia experiencia como mediador e prescriptor de lecturas neste ámbito.

Velaquí, en definitiva, o pensamento de Agustín no que atinxe á lectura, á súa promoción, á verdadeira relevancia que esta posúe na formación das persoas e na vida en xeral. Desde estas páxinas, un ano despois do seu falecemento, Agustín segue a iluminar un camiño con claridade e precisión como o mestre xeneroso e inesquecible que sempre foi, como o narrador excepcional que aínda hoxe nos segue sorprendendo e que seguimos querendo.

 

Advertisements

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s

Páxinas

Categorías

Arquivo

%d bloggers like this: