Caderno da crítica

Literatura galega: de todo un pouco; ás veces tamén opinións. Blogue de Ramón Nicolás

Cuestionario Proust: Tamara Andrés

Tamara Andrés

1.– Principal trazo do seu  carácter?

-O inconformismo, a compulsión.

2.– Que calidade aprecia máis nas persoas?

-A bondade.

3.– Que agarda das súas amizades?

-Comprensión.

4.– A súa principal eiva?

-Todo o que conleva quitarlle horas ao sono e á tranquilidade.

5.–  A súa ocupación favorita?

-Traballar coa palabra en todas as súas distintas vertentes. Mergullarme en filmes da Nouvelle Vague.

6.–  O seu ideal de felicidade?

-Poder vivir arredor da palabra e ter tempo libre para gozar dela, da arte e da vida. Construír sobre o equilibro.

7.– Cal sería a súa maior desgraza?

-Carecer de paixón.

8.– Que lle gustaría ser?

-Bailarina.

9.– En que país desexaría vivir?

-Na Bélxica que xa non é.

10.– A súa cor favorita?

-O negro.

11.– A flor que máis lle gusta?

-A lavanda.

12.– O paxaro que prefire?

-A curuxa.

13.– A súa devoción na prosa?

-Amélie Nothomb e Ana María Matute.

14.– E na poesía?

-Lois Pereiro e Xulio López Valcárcel.

15.- Un libro?

La vieja sirena (José Luis Sampedro).

16.– Un heroe de ficción?

-Antoine Doinel.

17.– Unha heroína?

-Matilda.

18.– A súa música favorita?

-O rock progresivo (Pink Floyd, Steven Wilson), a chanson francesa (Jacques Brel, Françoise Hardy), o jazz e a música clásica (ante todo, Chopin).

19.– Na pintura?

-O surrealismo (Magritte) e todo o que o circunde (Paul Delvaux, Giorgio de Chirico). Renoir. Celso Varela.

20.–  Un heroe ou heroína na vida real?

-Toda persoa que non deixe de aprender.

21.– O seu nome favorito?

-Amanda. Ten que ser fermoso levar o amor no nome.

22.– Que hábito alleo non soporta?

-Que se fume en espazos cerrados sen ter en conta a presenza de persoas que non deberían ou non queren tragar o fume.

23.– O que máis odia?

-A violencia e a pasividade. Recoñezo que os erros gramaticais me suscitan demasiada carraxe…

24.– A figura histórica que máis despreza?

-Os ditadores (Donald Trump tamén).

25.– Un feito militar que admire?

-Ningún como tal, mais interésame o romanticismo das revolucións.

26.– Que don natural lle gustaría ter?

-Destreza para a pintura.

27.– De que maneira lle gustaría morrer?

-Liviamente.

28.– Cal é o seu estado de ánimo máis habitual?

-Estresada.

29.– Que defectos lle inspiran máis indulxencia?

-A ignorancia.

30.– Un lema na súa vida?

-“A corps perdu” é unha expresión francesa que debería ser aplicable a todo: “a corpo perdido”, é dicir, en corpo e alma, coa paixón na carne.

Advertisements

Información

Esta entrada foi publicada o 15 Decembro 2017 por en Divulgación,Literatura galega , .

Páxinas

Categorías

Arquivo

%d bloggers like this: