Richard Louv
Vitamina N. Guía esencial para unha vida rica en natureza (tradución de Carlos Acevedo)
Faktoría K, Pontevedra, 320 páxinas, 17 €, 2019
Tras A Torre e Corredoira, avanza a colección Vitamina N, que acolle o selo pontevedrés Faktoría K, cun título homónimo ao da serie -dirixida por Antonio Sandoval Rey- e subtitulado “Guía esencial para unha vida rica en natureza”; un orixinal do escritor estadounidense Richard Louv, en tradución ao galego a cargo de Carlos Acevedo.
Tal e como se avisa é esta unha guía, coas características propias do xénero onde se formula unha idea interesante e suxestiva como é a do achegamento á natureza como filosofía de vida. Así pois o libro percorre, a través de oito capítulos, que contan ademais cunha rica información engadida en forma de bibliografía e webgrafía, poñer en práctica o descubrimento ou redescubrimento do que a natureza posúe e nos ofrece mesmo con fins de carácter terapéutico, mais non só pois é difícil non atopar aquí un recurso, unha actividade, unha posibilidade para ollar aos espazos naturais de maneira diferente, e especialmente suxestivo entendo o capítulo “A escola da natureza”.
No limiar do libro Louv dá conta de como o contacto, respectuoso, coa natureza resulta operativo para “mellorar a saúde mental e psíquica, para estimular a aprendizaxe, a creatividade e a sensación de estar completamente vivo”. En efecto, nestas páxinas apunta que as experiencias na natureza só poden ter beneficios como psicólogos, expertos en saúde pública, docentes e pedagogos ou políticos, entre outros, veñen afirmando. Benvido, pois, este Vitamina N, de Natureza, claro é.
Caderno da crítica 