Todos os anos o Caderno da crítica incorpora un apuntamento para desexarvos boas festas, boas lecturas e bo ano. Este ano que conclúe, en que o volume de novidades editoriais recibidas imposibilitou que atendera moitos títulos de inexcusable interese, faino con especial ilusión pois o vindeiro 2020 o Caderno cumpre dez anos de actividade case ininterrompida e, particularmente, trae canda si outro aniversario como é o de tres décadas escribindo crítica en diversas plataformas xornalísticas desde un artigo, publicado en agosto de 1990 no Diario 16 de Galicia, centrado -non podía ser doutro xeito- na actividade de Celso Emilio Ferreiro como colaborador en prensa.
Tempo haberá de celebralo como merece mais hoxe quero agradecer as visitas que realizades a esta bitácora, aos autores e autoras que me fan chegar as súas propostas literarias, ao conxunto das editoriais galegas que sempre me brindan a súa xenerosa colaboración e ao suplemento Fugas no que colaboro semanalmente. Beizón e bo ano.
Caderno da crítica 