A miña lingua a túa lingua, de Viravai

Viravai

A miña lingua a túa lingua

Galaxia, Vigo, 24 páxinas, 15,20 €, 2021

Recibín onte A miña lingua a túa lingua, publicado en Galaxia e do que se responsabiliza Oviravai: unha compañía de noso centrada no desenvolvemento de contidos educativos e culturais para un público infantil e familiar.

Nesta ocasión, pois xa contan no seu haber con outros proxectos musicais editados no mesmo selo editorial como foron As andanzas de Paio (2016) e Paio e o poder da música (2018), son tamén o seus fundadores, Verónica Santalices e Federico Welicki, xunto con Erika Welicki Santalices e Xacob Welicki Santalices, alén doutros músicos, os que ofrecen esta proposta en formato de álbum que incorpora un código QR para acceder aos contidos musicais e a diverso material audiovisual, con ilustracións a cargo de David Ouro. Co proxecto preténdese ofrecer unha introdución básica e efectiva aos contidos máis elementais e sinxelos da lingua inglesa a través dunha narración, loxicamente en galego, con ritmos vivos acaroados á música rock a través dunha personaxe que é a ‘teacher’ Lu, operativa como fío condutor do proceso de aprendizaxe dunha obra que, ademais, constitúe un material didáctico de inequívoca utilidade.